Poeple Man - Song Lyrics

Written by: Maria Bhola
Sung by: Maria Bhola

I already know so why all yuh movin’ so
D information done leak, all yuh still playin’ hide and seek
Lady I know you wit meh man and I know meh man wid you
So let’s just have dat discussion about wha we goin’ an do

Mondays we does eat leftovers but he really like fresh food
So maybe you could make dat yuh cook day cause I really doh be in d mood
Tuesdays I go to yoga and he goes to d gym
I suppose you could do we laundry since you perfectly fit and slim
Doh get no horrors about how we run we home
If anything is not to yuh likin’ yuh free to find a man of yuh own

Yuh want people, people man
Yuh want people, people man
We have rules and regulation
When yuh want people man

Yuh want people, people man
Yuh want people, people man
Yuh gotta make a contribution
When yuh borrowin’ people man

Is years we complainin’ how dem outside woman is tears
Long ago dey use to be discrete today dey boldface with their affairs
Well since it eh no secret I know ‘bout you and you know ‘bout me
Me eh waistin’ no time meh sistren welcome to d family

Wednesdays dem chiren have lessons, Daniel ketchin’ he tail wit Maths
I hope you at least have some passes so maybe you could help him wit dat
Thursdays is dance and drama and sporting activities
I go do d drop off and pick up and maybe you could pick up d fees
Doh geh no horrors me eh want yuh breakin’ yuh neck
An if yuh find is too much ah preshah yuh free to find a next home to wreck

Yuh want people, people man
Yuh want people, people man
Well you better pull yuh hand
When yuh want people man

Yuh want people, people man
Yuh want people, people man
Come wit a lil’ donation
When yuh borrowin’ people man

Mortgage, lights and cable honey dem bills doh be right
You could at least pay d WiFi we know you love to WhatsApp at night
Doh worry ‘bout groceries I cyah manage on your meal plan
But you could help out wit d sou sou ah know he does give yuh bout half ah he han

Fridays we spend as a family and we usually go somewhere
But my car done full already so you go have to make your way there
Saturday, well dais date night, and now dat we talkin’ in trees
I feel both ah allyuh could fix up I safer wit meh batteries
Doh geh no horrors me eh want yuh to be in shock
And if yuh find that I’m too demanding yuh free to find a next man to rock

Yuh want people, people man
Yuh want people, people man
You cyah vex wit d plan
When yuh want people man

Yuh want people, people man
Yuh want people, people man
Book yuh session in Double Palm
When yuh borrowin’ people man

Dem woman who out here laughin’ and shoutin’ “Sing Bhola! Sing!”
I could bet all meh money dem is d ones wearing d ring
But when last you clip he toe nails or you take out d garbage instead
Put dong yuh blasted cell phone, have ah conversation and rub he head

See Also
Music Sheet

Sundays you always complainin’ how you doh geh no help at all
An all he does do is cock up, drink he beer and watch he football
Well girlfriend you cyah play schupid when dem outside woman real bold
Is to go and cock up in front him and show him where to score d goal
You cyah be complainin’ how all yuh doh have no fun
But is 24/7 yuh smellin’ like Clorax and onion

They want people, people man
They want people, people man
Girl you better take yuh scan
Cause they want people man

They want people, people man
They want people, people man
Careful they upgrade yuh plan
Cause they borrowin’ people man

People Man Lyrics
Calypso 2023
Trinidad and Tobago

 

Suggest Edits


Ad
cjsays t-shirts ad
Advertise here
Facebook Comments
Scroll To Top